संकटा र थ्री स्टारबीच शनिबार हुने खेलले धेरै हदसम्म सहिद स्मारक लिग ए डिभिजन ०७८ मा शीर्ष चारमा रहने टिमको निर्धारण गर्न सक्नेछ ।
संकटा आठ खेलबाट १४ अंक जोडेर तेस्रो स्थानमा छ र अहिलेसम्म अपराजित छ । थ्री स्टार भने समान आठ खेलबाट १३ अंक जोडेर पाँचौं स्थानमा छ ।
लिगका पछिल्ला पाँच संस्करणमध्ये यी दुई टिमबीचको भेट तीन वर्ष मात्र भएको छ । त्यसमा संकटा थ्री स्टारमाथि हाबी रहेको छ ।
यसबीच चार खेल भएका छन्, जसमा दुई खेल संकटाले जितेको छ भने एक खेल थ्री स्टारले । थप एक खेल बराबरीमा रहेको थियो ।
संकटा फेरि ए डिभिजनमा फर्के यता वर्ष ०७० मा उसले थ्री स्टारलाई १–० ले हराएको थियो ।त्यही वर्षको अर्को खेल गोलरहित बराबरीमा टुंगियो ।
वर्ष ०७५ मा पनि संकटाले थ्री स्टारलाई २–१ ले हराएको थियो । वर्ष ०७६ को पछिल्लो खेलमा भने थ्री स्टार विजयी रह्यो । उसले प्राप्त गरेको १–० जितमा निर्णायक गोल गरेका थिए, अनन्त तामाङले ।
थ्री स्टार अहिले केही हदसम्म लय समाट्न सफल रहेको छ र लगातार दुई खेलमा विजयी रहेको छ । संकटा यिनै पछिल्ला दुई खेलमा लगातार बराबरी खेलेको छ ।