काठमाडौं । नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताइरी टिमको प्रशिक्षणमा फर्किएका छन् ।
गत आइतबार राजीनामा दिने घोषणा गरेपछि अलमुताइरी टिमको प्रशिक्षणमा सामेल भएका थिएनन् ।
तर, अलमुताइरी शनिबारबाट टिमको प्रशिक्षणमा फर्किएका हुन् । बन्द प्रशिक्षणमा रहेका खेलाडीको दुई टिमबीचको मैत्रीपूर्ण खेलमा अलमुताइरी मैदान उत्रिएका थिए । अलमुताइरीले विजेता टोली टिम नितिनबाट खेलेका थिए ।
पछिल्लो समय अलमुताइरी एन्फाका वरिष्ठ उपाध्यक्ष पंकज नेम्बाङ र दुई संचारकर्मीसँगको विवादमा तानिएका थिए ।
प्रशिक्षक अलमुताइरीले आइतबार सामाजिक संजाल फेसबुकबाट नेम्बाङको कारण आफुले राजीनामा दिने लागेको बताएका थिए । तर, एन्फालाई राजीनामा पत्र भने बुझाएका थिएनन् ।
अलमुताइरीले उक्त विवादबारे छानबिनको माग गर्दै एन्फामा निवेदन समेत दर्ता गराएका थिए ।
विवाद मिलाउन एन्फाले शुक्रबार कार्यसमितिको बैठक बोलाएको थियो । उक्त बैठकले घटनाको उच्चस्तरीय छानबिनका लागि युवा तथा खेलकुद मन्त्रालयलाई सिफारिस गर्ने निर्णय गरेको थियो ।
एन्फा प्रवक्ता किरण राईले शुक्रबार छानविन सकिएपछि मात्र प्रशिक्षक प्रशिक्षणमा फर्कने बताएका थिए ।
शनिबार खेलाडीबीचको मैत्रीपूण खेलमा भने अलमुताइरी सहभागी भए । एन्फाले अलमुताइरी मैत्रीपूर्ण खेलका लागि मात्र मैदानमा देखिएको बताएको छ ।
अलमुताइरी आफैले छानविन सकेर मात्र प्रशिक्षणमा सहभागी हुने इच्छा राखेका छन् । उनले छानविन नसकेसम्म खेलाडीलाई प्रशिक्षण नदिने बताएका छन् ।
तालिका अनुसार एन्फाले शनिबारबाट खेलाडीलाई केही दिनको आराम दिएको छ । लामो समय बन्द प्रशिक्षणमा रहेका खेलाडीले परिवारसंग भेट्न र समय बिताउन माग गरेपछि एन्फाले योजना अनुसार केही दिन खेलाडीलाई आराम दिएको हो ।
खेलाडी प्रशिक्षणमा फर्कने र राजीनामा प्रकरणको छानविन समेत संगै सकिने एन्फाको विश्वास छ । छानविन सकिएपछि अलमुताइरीले खेलाडीलाई नियमित रुपमा प्रशिक्षण दिनेछन् ।
