काठमाडौं । त्रिभुवन आर्मी फुटबल क्लबका मुख्य प्रशिक्षक नविन न्यौपानेले एएफसी कप-२०२१ प्ले अफको दोस्रो चरण पुग्ने टिमको पहिलो लक्ष्य पूरा भएको बताएका छन् ।
त्रिपुरेश्वरस्थित दशरथ रंगशालामा बुधबार श्रीलंका पुलिस स्पोर्ट्स क्लबलाई ५-१ गोल अन्तरले पराजित गरेपछि मुख्य प्रशिक्षक न्यौपानेले टिमको पहिलो लक्ष्य सफल भएको बताए ।
'आज सोचेको जस्तै भयो । हाम्रो लक्ष्य थियो । सबै खेलाडी शतप्रतिशत दियो । टाक्स अनुसार खेलाडीले कर्तव्य पूरा गरे,' उनले भने, 'थ्री नेसन्सको खुशी दोहोर्याउने लक्ष्य थियो । पूरा भयो । हामी खुसी छौँ ।'
श्रीलंका पुलिसविरुद्ध आर्मीले पुनरागमन जित निकालेको हो । श्रीलंका पुलिसका इभान्सले गोल गर्दै टिमलाई अग्रता दिलाएका थिए ।
तर, नवयुग श्रेष्ठले दुई तथा सन्तोष तामाङ, टंक बहादुर बस्नेत, सुदिल राईले एक एक गोल गरेपछि आर्मीले सानदार जित निकालेको हो ।
यस्तै प्रशिक्षक न्यौपानेले खेलाडीको प्यासनले गर्दा जित निकाल्न सफल भएको बताए ।
'सुरुवातमा गोल खाएपनि खेलाडीको प्यासनले गर्दा जित निकाल्न सफल भयौं । मलाई मेरा खेलाडीमा विश्वास थियो । हाम्रो एउटा लक्ष्य थियो,' उनले भने ।
अब आर्मीले दोस्रो चरणमा भारतको बेंगलुरु फुटबल क्लबसँग खेल्नेछ । उक्त खेल बैशाख १ मा हुनेछ ।
प्रशिक्षक न्यौपानेले बेंगलुरुविरुद्धको खेलमा थप मेहेनत गर्ने समेत बताए ।
'त्यो खेल अर्को स्तरको हुन्छ । त्यसैले थप मेहेनत गरेर अघि बढ्ने छौँ ।
मलाई मेरा खेलाडीमा विश्वास थियो । हाम्रो एउटा लक्ष्य थियो । हाम्रो टिम बलियो छ । हामी तयार छौँ,' उनले थपे ।
न्यौपानेले टिमको फिनिसिङमा अझै सुधार गर्नु पर्ने बताए ।
श्रीलंका पुलिसका प्रशिक्षक झिलाउ अल्पेन्सुले आफु खेलबाट सन्तुष्ट भएको बताए ।
'खेलबाट सन्तुष्ट छु । खेलाडीले राम्रो खेल्यो । डिफेन्स लाइन कमजोर हुँदा अग्रता जोगाउन सकेनौं । खेलाडीमा अनुभवको कमी देखियो,' उनले थपे ।
