काठमाडौं । सहिद स्मारक 'बी' डिभिजन लिग फुटबलमा बाँसबारी क्लबले सहज जित निकालेको छ ।
एन्फा कम्प्लेक्स सातदोबाटोमा आइतबार भएको खेलमा बाँसबारीले झम्सिखेल युथ क्लबलाई ४-० गोल अन्तरले पराजित गरेको हो ।
बाँसबारीको जितमा निशान सुनारले दुई गोल गरे । कमल खवास र अजय राजवंशीले एक एक गोल गरे ।
खेलको २६ औं मिनेटमा निशानले गोल गर्दै बाँसबारीलाई अग्रता दिलाएका थिए ।
खेलको ३८ औं मिनेटमा कमलको गोलबाट बाँसबारीले २-० को अग्रता बनायो ।
६० औं मिनेटमा अजयले गोल गर्दै टिमलाई ३-० को अग्रता दिलाए ।
त्यसपछि खेलको ६८ औं मिनेटमा निशानले व्यक्तिगत दोस्रो गोल गर्दै बाँसबारीलाई ४-० को जित दिलाए ।
जितसँगै बाँसबारीले १० खेलमा २१ अंक जोडेको छ ।
बाँसबारी लिगको तेस्रो स्थानमा रहेको छ ।
झम्सिखेल १० खेलमा ६ अंक जोडेर ११ औं स्थानमा रहेको छ ।
