अविनास थापा
निजगढ । निजगढ युवा क्लब 'ए'ले तेस्रो निजगढ मेयर कप फुटबल प्रतियोगिताको उपाधि जितेको छ ।
आइतबार भएको फाइनलमा योङ्गस्टार युवा क्लबलाई टाईब्रेकरमा ४-३ गोल अन्तरले पराजित गर्दै निजगढ च्याम्पियन बनेको हो ।
खेलको निर्धारित र थप गरिएको समयमा गोलरहित बराबरीमा सकिएपछि खेल टाईब्रेक्ररमा पुगेको थियो ।
उपाधिसंगै निजगढले १ लाख नगद प्राप्त गरेको छ । उपविजेता योङ्गस्टारले ४५ हजार प्राप्त गर्यो ।
प्रतियोगिताको सर्वोत्कृष्ट खेलाडी योङ्गस्टारका अरुण लामा घोषित भए ।
यस्तै उत्कृष्ट डिफेन्डर योङ्गस्टारका सुनिल लामा र उत्कृष्ट गोलरक्षक निजगढका रोशन धामी भए ।
त्यसैगरी निजगढका कप्तान राजकिशोर धामी उत्कृष्ट मिडफिल्डर, निजगढका समिर तामाङ सर्वाधिक गोलकर्ता चुनिदा रतनपुर युनाईटेड युथ क्लबले फेयर प्ले अवार्ड हात पार्यो ।
निजगढ युवा क्लबले आयोजना गरेको प्रतियोगितामा निजगढ नगरपालिकाका १६ वटा क्लबहरुले प्रतिस्पर्धा गरेका थिए ।
प्रतियोगिताको समापनमा निजगढका मेयर सुरेश कुमार खनालले निजगढमा फुटबल खेलको बिकास गर्दै खेलाडी उत्पादन गर्न नगरपालिकाले ग्रासरुट फुटबललाई प्राथमिकता दिने बताए ।
मेयर खनालले मेयर कप फुटबल खेलाडी उत्पादन र पहिचान गर्ने महत्वपूर्ण माध्यम भएको बताए ।
समापन समारोहलाई राष्ट्रिय खेलकुद परिषदका पूर्व सदस्य सचिव युवराज लामा,नेपाल तेक्वान्दो संघ प्रदेश २ का अध्यक्ष पेमासिद्धि लामा,अखिल नेपाल फुटबल संघ एन्फा प्रदेश २ का अध्यक्ष नेपाल कार्की लगायतका व्यक्तित्वहरुको उपस्थिति रहेको थियो ।
