काठमाडौं । कोरोना भाईरसको महामारिका कारण गत चैतबाट रोकिएको घरेलु फुटबल सुरु भएको छ ।
अखिल नेपाल फुटबल संघ (एन्फा) ले चैतबाट ठप्प रहेको घरेलु फुटबलको गतिविधिलाई बुधबारबाट ब्युताएको हो ।
एन्फाले बुधबारबाट राष्ट्रिय महिला लिग फुटबलको आयोजना गर्दै घरेलु फुटबललाई फर्काएको हो ।
गत चैतमै हुनुपर्ने महिला लिग कोरोना महामारीकै कारण रोकिएको थियो ।
तर, सरकारले खेलकुद गतिविधि अघि बढाउँन अनुमति दिएसंगै एन्फाले महिला लिगको आयोजना गरेको हो ।
त्रिपुरेश्वरस्थित दशरथ रंगशाला दुई विभागीय टिम त्रिभुवन आर्मी क्लब र नेपाल पुलिस क्लबबीचको खेलसँगै नेपालमा घरेलु फुटबल फर्किएको हो ।
तर, विभागीय डर्बी भिडन्त गोलरहित बराबरीमा सकिएको थियो ।
यस्तै एन्फाले महिला लिगमा दर्शकलाई समेत प्रवेश खुल्ला गरेको थियो । उद्घाटन खेलमा निशुल्क प्रवेश दिईएको खेलमा उल्लेख्य मात्रामा दर्शकको उपस्थित रहेको थियो ।
महिला लिग सुरु भएसंगै करिब १० महिना मैदान टेक्न नपाएका खेलाडीले समेत सुखद् अनुभव गरे । उनीहरु मैदान छिर्न पाउँदा र खेल्न पाउँदा निकै खुसी देखिन्थे ।
तर, १० महिनापछि मैदान फर्कदा खेलाडीलाई असहज भएको प्रस्ट देखिन्थ्यो । दुबै टोलीका खेलाडी तालमेल मिलाउन सकिरहेका थिएनन् भने फिटनेसको समस्या स्पस्ट देखिन्थ्यो ।
लामो समयपछि मैदान फर्कदा खेलाडीलाई गार्हो भएको दुबै टिमका प्रशिक्षकले समेत स्वीकारे ।
‘धेरै पछि गेम नभएको अवस्थामा एकैपटक खेल्दा राम्रो मुमेन्ट भएपनि स्कोरमा चुुक्यौं । फिनिसिङ भएन,’ आर्मीका मुख्य प्रशिक्षक राजु तामाङले खेलपछि भने ।
नेपाल राष्ट्रिय फुटबल टोलीका पूर्व सदस्य समेत रहेको राजुले खेलाडीको ड्युटी र कोरोनाको कारण खेलाडीले राम्रो खेल्न नपाएको बताए ।
‘खेलाडी पनि विभागीय ड्युटीमा थिए । तयारी पनि त्यस्तै ४५ दिन जति गर्याै । मैत्रिपूर्ण खेल पनि भएन । पुलिसविरुद्धको बराबरीमा पनि हामी सन्तुष्ट छौं,’ राजुले थपे ।
पुलिसका मुख्य प्रशिक्षक संजिब जोशीले आफ्ना खेलाडीमा फिटनेसको समस्या धेरै नआएको बताए ।
‘खेलाडीलाई फिटनेशमा बस्नु भनेको थिए । तरपनि केहि कम त थियौ नै । डेढ दुई महिनाको तयारी थियो । राम्रो भयो,’ पुलिस तथा राष्ट्रिय टोलीका पूर्व गोलरक्षक समेत रहेको जोशीले भने ।
पहिलो पटक डबल राउण्ड रोबिनको आधारमा जारी महिला लिगमा ७ टोलीको सहभागीता रहेको छ ।
तीन विभागीय टोली (शसस्त्र प्रहरी बल एपीएफ, नेपाल पुलिस क्लब, त्रिभुवन आर्मी फुटबल क्लब) सहित चौदण्डीगढी नगरपालिका, वालिङ नगरपालिका, चन्द्रपुर नगरपालिका र विराटनगर महानगरपालिकाको सहभागिता रहेको छ ।
महिला लिग पहिलो पटक नयाँ ढाँचामा आयोजना हुन् लागेको हो । यस अघिको संस्करणमा हप्दा दिनमा सकिने महिला लिगले पहिलो पटक राउण्ड रोविनको आधारमा हुनेछ ।
यस पटकको लिगमा सहभागी टोलीले ४ विदेशी खेलाडी समेत राख्न पाउनेछन् ।
प्रतियोगिताको विजेता टोलीले १५ लाख प्राप्त गर्दा दोस्रोले ८, तेस्रोले ५, तथा चौथो टोलीले ३ लाख प्राप्त गर्ने एन्फाले जनाएको छ ।
यस्तै सर्बाेत्कृष्ट खेलाडीले एक थान स्कुटर प्राप्त गर्दा विधागत उत्कृष्ट खेलाडीले जनही ५० हजार प्राप्त गर्नेछन् ।
एन्फाले महिला लिगपछि पुरुषको 'बी' डिभिजन र 'सी' डिभिजन लिग गर्ने बताएको छ । 'बी' डिभिजनका बाँकी खेलहरु फागुन ११ देखिबाट सुरु गर्ने एन्फाले जनाएको छ ।
त्यस्तै 'सी' डिभिजन लिग चैत १ गतेबाट गर्ने एन्फाले निर्णय गरिसकेको छ ।