हेटौडा । हेटौंडाको हुप्राचौरमा जारी हेटौडा भेट्रान्स कप एट ए साइड फुटबल प्रतियोगितामा बगरभाई खलक पोखरा, चाबहिल भेट्रान्स, सानो गौचरण काठमाडौं र हेटौंडा भेट्रान्स सुपरले जित निकालेका छन् ।
बुधबार भएको पहिलो खेलमा बगरभाईले हाम्रो वीरगंज भेट्रान्सलाई टाइब्रेकरमा ३-२ ले हराएको हो । खेलको निर्धारित समय १-१ गोलको बराबरीमा सकिएको थियो । तर, टाइब्रेकरमा भने बगरभाईले बाजी मार्यो ।
दोस्रो खेलमा चाबहिलले बौद्व भेट्रान्सलाई १-० ले पराजित गर्यो । चाबहिललाई जित दिलाउन सरोज थापाले निर्णायक गोल गरे ।
सानो गौचरणले भनिमण्डल भेट्रान्सलाई १-० गोल अन्तरले नै हराएको छ । सानो गौचरणको लागि नरेश श्रेष्ठले निर्णायक गोल गरे ।
यस्तै हेटौंडा भेट्रान्सले टाइब्रेकरमा सिमरा भेट्रान्सलाई ४-३ गोल अन्तरले पराजित गरेको छ ।
प्रतियोगिताको विजेताले १ लाख १ हजार १ सय ११ रुपैया, उपविजेताले नगद ५१ हजार १ सय ११ रुपैया प्राप्त गर्नेछन् ।
