नेपालगन्ज । आयोजक जयकिसान स्पोर्ट्स ‘ए’ प्रथम स्वर्गीय श्याम थापा प्रथम स्मृति फुटबल प्रतियोगिताको सेमिफाइनलमा प्रवेश गरेको छ ।
शनिबार भएको क्वाटरफाइनलमा राजापुर क्लब, बर्दियालाई ४-० गोल अन्तरले पराजित गर्दै जयकिसान सेमिफाइनलमा पुगेको हो ।
निरज चौधरीले खेलको २२ औं मिनेटमा गोल गर्दै जयकिसानलाई अग्रता दिलाएका थिए । खेलको २७ औं मिनेटमा विक्रमसिंह ठकुरीले गोल गर्दै टोलीको अग्रता २-० को बनाए ।
खेलको ५६ औं मिनेटमा विक्रमसिंहले व्यक्तिगत दोस्रो गोल गर्दा जयकिसान ३-० ले अघि रह्यो । त्यसपछि खेलको ७० औं मिनेटमा कृष्ण गुरुङले गोल गर्दै टोलीलाई ४-० को जित दिलाए ।
यस्तै पहिलो क्वाटरफाइनलमा मसुरिया क्लाब धनगढीले रेसिङ साहरा क्लब कोहलपुरलाई २-० ले हरायो । मसुरियाका लागि विवश बोहाराले दुई गोल गरेका थिए ।
जय किसानले आयोजना गरेको प्रतियोगिता माघ ९ गतेसम्म चल्ने छ । प्रतियोगितामा भारतीय दुई टिमसहित नेपालका विभिन्न क्लबहरु गरी १७ टिमले भाग लिएका छन् ।
नकआउटको आधारमा हुने प्रतियोगिताको विजेताले एक लाख पाँच हजार रुपैयाँ र उपविजेताले ५५ हजार रुपैयाँ पाउने आयोजक जय किसान स्पोर्ट्स क्लब सैनिकका अध्यक्ष दीपु रानाले बताए ।