काठमाडौं । शीर्ष डिभिजन लिगका १३ क्लबले गरेको ए लाईसेन्स प्रक्रिया आवेदनमा एसियाली फुटबल फेडेरेशन (एएफसी)ले अस्विकार गरेको छ ।
अखिल नेपाल फुटबल संघ (एन्फा)ले नयाँ सिजन २०२१ को एएफसी क्लब प्रतियोगिताको सहभागीताका लागि गरेको क्लब आवेदनमा एएफसीले मापदण्ड नपुगेको भन्दै प्रस्ताव अस्विकृत गरेको हो ।
एन्फाले सोमबार ए डिभिजनका १३ क्लबले दिएको लाईसेन्स आवेदन रद्ध भएको जनाएको छ । यस पटक लिगमा घटुवा भएको सरस्वती क्लबले भने लाईसेन्सका लागि आवेदननै दिएन ।
ए लाइसेन्स प्रक्रिया लगभग नजिक पुगेको विभागीय आर्मी क्लबलाई एएफसीले आर्मीको प्रतिबद्धता र प्रयासलाई प्रशंंसा समेत गरेको छ ।
यस अघिनै एन्फाले आवश्यक कागजातहरु नपुगेको भन्दै शीर्ष डिभिजनका क्लबलाई एएफसीको लाईसेन्सको सिफारिस नगर्ने बताउँदै आएको थियो ।
एन्फाले यस पटकबाट ए डिभिजन लिग खेल्न एन्फा लाईसेन्स अनिबार्य गरेको छ ।
गत बर्ष गलत तरिकाले क्लबलाई लाईसेन्स वितरण गरेको भन्दै एएफसीले एन्फालाई ठुलो रकम आर्थिक जरिवाना गरेकाे थियाे ।
एएफसीले एन्फालाई तत्काल १० हजार डलर जरिवाना गरेको थियो । गल्तीमा सुधार नगरेमा प्रतिबन्ध सहित ३५ हजार डलर भन्दा बढी जरिवाना गर्ने चेतावनी दिएकाे थियो ।
एन्फाको क्लब लाईसेन्सिङ कमिटिको आवश्यक कागजात नपुगेको भन्दै शीर्ष डिभिजनका क्लबलाई एएफसीको लाईसेन्सको सिफारिस नगर्ने निर्णय गरेको हो ।
एएफसीले लाइसेन्सका लागि मापदण्डहरु तयार गरेकाे छ । क्लबले लाइसेन्स पाउन आफ्नै स्वामित्वकाे फुटबल मैदानदेखि युवा टाेली लगायतका प्रावधान लाइसेन्सका लागि अनिवार्य गरिएकाे छ ।
लाईसेन्स नपाउँदा असर के ?
एएफसीको क्लब लाईसेन्स नपाएपछि अब कुनैपनि क्लबले एएफसीले आयोजना गर्ने प्रतियोगिता खेल्न पाउने छैनन् ।
लिग च्याम्पियनको हैसियतमा ए डिभिजन क्लबले एएफसी कप खेल्दै आएका थिए ।
तर अब एएफसीको क्लब लाईसेन्स नपाएपछि एएफसीले आयोजक गर्ने एएफसी कप नेपाली क्लबले खेल्न पाउने छैनन् ।
’ए’ डिभिजन लिग खेलेका १४ क्लब :
मछिन्द्र फुटबल क्लब, त्रिभुवन आर्मी क्लब, मनाङ मर्स्याङ्दी क्लब, थ्रीस्टार क्लब, नेपाल पुलिस क्लब, जावलाखेल युथ क्लब, संकटा क्लब, न्युरोड टिम एनआरटी क्लब, च्यासल युथ क्लब, हिमालयन शेर्पा क्लब, फ्रेन्डस् क्लब, एपीएफ क्लब, ब्रिगेड ब्वाईज क्लब, सरस्वती क्लब (बी डिभिजनमा घटुवा)
