एजेन्सी । स्पेनिस क्लब रियल मड्रिडले च्याम्पियन्स लिग फुटबलमा सहज जित निकालेको छ ।
बुधबार राति भएको खेलमा रियलले १० खेलाडीमा समेटिएको इटालियन क्लब इन्टर मिलानलाई २-० गोल अन्तरले पराजित गरेको हो ।
इन्टरको मैदानमा रियललाई जित दिलाउन इडेन हाजार्डले एक गोल गरे । रियलले एक गोल आत्मघाती उपहार पाएको थियो ।
पहिलो हाफको सातौं मिनेटमा हाजार्डले पेनाल्टीमा गोल गर्दै रियललाई अग्रता दिलाएका थिए ।
खेलको ३३ औं मिनेटमा अर्टुरो भिडालले दोहोरो पहेलो कार्डसहित रातो कार्ड पाएपछि इन्टर १० खेलाडीमा समेटिएको थियो ।
त्यसपछि खेलको ५९ औं मिनेटमा इन्टरका अचार्फ हाकिमीले आत्मघाती गोल गरेपछि रियलले २-० को जित निकाल्यो ।
जितसँगै समूह 'बी' को रियलले ४ खेलमा ७ अंक जोडेको छ । रियलको नकआउट चरणमा पुग्ने सम्भावना कायम रहेको छ ।
इन्टरले भने ४ खेलमा २ अंक जोडेको छ । इन्टर पुछारमा रहेको छ ।
यसै समूहको अर्को खेलमा बोरुसिया मुन्छेनग्लाडबाखले शाख्तर डोनेस्कटलाई ४-० ले हराएको छ।
मुन्छेनग्लाडबाख ८ अंक जोडेर शीर्ष स्थानमा रहेको छ ।
