एजेन्सी । ब्राजिली स्टार नेयमारले चोट बोकेको खेलमा पेरिस सेन्ट जर्मेन (पीएसजी)ले च्याम्पियन्स लिग फुटबलमा इस्तानबुल बासाकेशिरलाई हराएको छ ।
बुधबार राति भएको समूह एचको खेलमा पीएसजीले टर्कीस क्लब इस्तानबुल बासाकेशिरलाई २–० ले हराएको हो ।
पीएसजीको जितमा यसै सिजन एभर्टनबाट लोनमा आएका मोइस केनले दुई गोल गरे ।
खेलको ६४ औं मिनेटमा पहिलो गोल गरेका उनले ७९ औं मिनेटमा दोस्रो गोल गरेका थिए । केनको दुवै गोलका लागि केलियन एम्बाप्पेले पास मिलाएका थिए ।
खेलको सुरुवातमै मांशपेशीमा चोट बोक्दै नेयमार मैदानबाट बाहिरीएका थिए ।
च्याम्पियनस लिगको पहिलो खेलमा म्यान्चेष्टर युनाईटेडसंग हार ब्यहोरेको पीएसजीले पहिलो जित दर्ता गरेको छ । पीएसजी गत सिजनको उप विजेता टोली हो ।
पीएसजीले समूहमा तीन अंक जोडेको छ । टर्कीस क्लब अंक विहिन हुँदै पुछारमा छ ।
