एजेन्सी । लण्डन क्लब आर्सनलले ब्राजिली स्टार विलियनलाई तीन बर्ष अनुबन्धनको आकर्षक प्रस्ताव राखेको छ ।
यस सिजनको अन्त्यसंगै लण्डन क्लब चेल्सी छाड्ने तयारीमा लागेका विलियनलाई आर्सनलले तीन बर्षको आकर्षक प्रस्ताव राखेको हो ।
३१ बर्षका विङ्गरले स्टामफोर्ड ब्रिज क्लब चेल्सीले राखेको दुई बर्षको प्रस्ताव अस्विकार गरिसकेका छन् । ब्राजिली विङ्गर पछिल्लो समय आर्सनलसंग छलफलमा केन्द्रित छन् । उनले आर्सनलसंग चार बर्षको अनुबन्धनको माग गरिरहेका छन् ।
चेल्सीका प्रशिक्षक फ्रान्क लाम्पार्ड विलियनसंग खुसी छन् । उनी ब्राजिली स्टारलाई क्लबमा राख्न चाहन्छन् । तर विलियनले चेल्सीसंग कम्तिमा तीन बर्षको सम्झौता माग गरेका छन् । जो दिन स्टामफोर्ड ब्रिज क्लब तयार देखिएको छैन ।
विलियनले चेल्सीमा ७ बर्ष बिताएका छन् । तर नयाँ सम्झौताको बिषयमा विलियन र चेल्सीबीच सहमती बन्न सकेको छैन ।
आर्सनलले चेल्सीसंग विलियनको सम्भावित सम्झौताको प्रतिक्षा गरिरहेको छ । विलियनले च्याम्पियन्स लिगको अन्तिम १६ को दोस्रो लेगमा वायर्न म्युनिखबिरुद्ध खेल्नु अघि चेल्सीसंग गर्न सक्ने सम्झौतामा आर्सनल केन्द्रित छ ।
विलियनले तीन बर्षको सम्झौता नपाएको खण्डमा चेल्सी छाड्ने निश्चित छ ।
विलियनमाथि युरोपका ठुला क्लबले आखाँ लगाईरहेका छन् । विलियनका एजेन्टले युरोपका ५ ठुला क्लबले विलियन अनुबन्धनको चाहना राखेको बताएका थिए । उनका अनुसार प्रिमियर लिगका दुई र स्पेनिस महारथी बार्सिलोना समेत विलियन अनुबन्धनमा ईच्छुक छ ।
फ्रान्सेली खेल पत्रिकाका अनुसार रियल मड्रिड, म्यान्चेष्टर युनाईटेडदेखि अमेरिकाको ईन्टर मियामी समेत विलियन अनुबन्धनमा ईच्छुक छ ।
तर आर्सनलका टेक्निकल निर्देशक इडु, जो ब्राजिलका पूर्व अन्तराष्ट्रिय खेलाडी हुन्, उनले समेत विलियनलाई आर्सनल ल्याउन प्रभाव पार्न सक्ने बताईएको छ ।
विलियन यस सिजन लाम्पार्डको टिमका मुख्य खेलाडी रहे । उनले चेल्सीका लागि ३८ मध्य ३६ खेलमा सहभागी बने ।
चेल्सीले नयाँ सिजनका लागि अजाक्सबाट हाकिम जियाच र आरबी आईपेजिंगबाट टिमो वार्नरलाई अनुबन्धन गरिसकेपछि अर्को सिजन विलियनको भूमिका घट्ने सक्ने अनुमान गरिएको छ ।
विलियन एफ ए कपको फाईनल खेलमा चेल्सीको जर्सीमा मैदान उत्रिएनन् । यद्धपी उनी खेल्नका लागि तयार रहेको रिपोर्ट सार्वजनीक भएको थियो ।
विलियन सन् २०१३ मा लण्डन क्लब चेल्सी आएका थिए । उनले ३ सय ३९ खेलमा प्रतिनिधित्व गरे । जसमा ६३ गोल गर्न सफल रहे ।
उनले चेल्सीबाट दुई प्रिमियर लिग, एक एफ ए कप, एक लिग कप र एक युरोपा लिग जितेका छन् ।
