काठमाडौं । ललितपुरे क्लब थ्री स्टार क्लबले सहिद स्मारक 'ए' डिभिजन लिग फुटबलको अन्तिम खेलमा जित निकालेको छ ।
सातदोबाटोस्थित एन्फा कम्प्लेक्समा शुक्रबार भएको आफ्नो अन्तिम खेलमा थ्री स्टारले च्यासल युथ क्लबलाई २-० गोल अन्तरले पराजित गरेको हो ।
ललितपुर डर्बीमा थ्री स्टारलाई जित दिलाउन अनन्त तामाङ र भारतीय खेलाडी लाल राम्मव्राले एक एक गोल गरे ।
पहिलो हाफ गोलरहित बराबरीमा सकिएको दोस्रो हाफमा थ्री स्टारले दुई गोल गरेको थियो ।
खेलको ७० औं मिनेटमा लाल राम्मव्राले हेड गोल गर्दै थ्री स्टारलाई सुरुवाती अग्रता दिलाएका थिए । उनले निशान खड्काको फ्रिकिक बललाई हेडबाट पोस्टको दिशा देखाएका थिए ।
त्यसपछि खेलको इन्जुरी समयमा अनन्तले पेनाल्टीमा गोल गर्दै थ्री स्टारलाई २-० को जित दिलाए । च्यासलका डिफेन्डर छिरिङ गुरुङले डिबक्स भित्र लाल राम्मव्रालाई लडाएपछि रेफ्री प्रकाश नाथ श्रेष्ठले थ्री स्टारलाई पेनाल्टी दिएका थिए । जसमा अनन्त चुकेनन् ।
जितसँगै थ्री स्टारले लिगमा सुखद अन्त्य गरेको छ र लिगको तेस्रो स्थानमा उक्लिएको छ । थ्री स्टारले १३ खेलबाट २६ अंक जोडेको छ ।
च्यासलले भने हारबाट सिजनको अन्त्य गरेको छ । च्यासलले १३ खेलमा १५ अंक जोडेको छ । च्यासल आठौं स्थानमा रहेको छ ।
के भन्छन् प्रशिक्षक ?
थ्री स्टारका प्रशिक्षक मेघराज केसीले क्लबको योजना अनुसार सफल भएको बताए ।
' थ्री स्टारलाई राम्रो भन्दा राम्रो गर्ने भनेका थियौं। त्यसैमा लाग्यौं । यो पटक हामी सफल भएको भन्छौं,' उनले भने, 'हामी कुन पोजिसन आउनु भन्दा पनि कति जना युवा खेलाडीलाई ल्यायौं भन्ने हो ।'
यस्तै उनले ए डिभिजन लिगमा भएको खुसी व्यक्त गरे ।
'लिग भयो । हामी यसैमा खुसी हुनुपर्छ । तर, नेपालमा यसरी फुटबल खेलेर मात्रै सुधार हुदैन । लिग सक्किएपछि टिम छाडेर हुँदैन । मोफसलमा दुई महिना व्यस्त भईन्छ । त्यसपछी के गर्ने हो । त्यो प्रोग्राम चाहियो । कम्तिमा १० महिना खेल हुनुपर्यो,' उनले थपे ।
च्यासलका प्रशिक्षक बाल गोपाल साहुखलले थ्री स्टारले अन्तिम खेलमा राम्रो खेलेको बताए ।
'खेल ठिकै भयो । डिफेन्सिभमा थ्री स्टार राम्रो भयो । थ्री स्टारले राम्रो खेल्यो । दिनेश आउदा पनि हाम्रो डिफेन्स राम्रो भएन,' उनले भने, ' खेलाडीको मानसिकता ठिक नहुदा तेस्रो खेलबाट राम्रो भएन । लक्ष्य ठुलो थियो । तर, सोचेजस्तो भएन ।'
थ्री स्टार प्लेईङ सेट -
अनन्त तामाङ, लाल राम्मव्रा, विक्रम लामा, प्रिसो,मिक्छेन तामाङ,रुपेश केसी,अशोक खवास, सुशन श्रेष्ठ,सन्जोग राई, निशान खड्का,सुशील राई
च्यासल प्लेईङ सेट -
एलेन न्यौपाने,दिनेश राजवंशी,अविशेक लिम्बु,बिक्रम लिम्बु,ताइगा नाकामुरा, छिरिङ गुरुङ,अमिर श्रेष्ठ, हेमन्त थापा मगर, सुनिल बल,हायातो वाकिनो, सन्तोष साहुखल
.JPG)
