काठमाडौं। सनराइजर्स हैदराबाद इन्डियन प्रिमियर लिग (आइपिएल) को लिग चरणबाटै बाहिरिएको छ।
सोमबार हैदराबाद र दिल्ली क्यापिटल्सबीचको खेल वर्षाका कारण अनिर्णीत रह्यो। योसँगै हैदराबाद बाहिरिन परेको हो। अर्कोतर्फ दिल्ली शीर्ष ५ मा यथावत छ।
सोमबार पहिले बलिङ गर्न आएको हैदराबादले दिल्लीलाई १३३ रन मात्र बनाउन दियो। हैदराबादसँग खेल जित्ने मौका थियो। तर, वर्षाका कारण दोस्रो इनिङ्स सुरु हुन सकेन। जसका कारण खेल अनिर्णीत रह्यो र दुवै टोलीले १–१ अंक बाँडे।
हैदराबादले ११ खेलमा तीन जित र एक बराबरी खेल्दै सात अंक जोडेको छ। टोली आठौं स्थानमा पुग्यो। तर, प्लेअफबाट बाहिरियो। अब पछिल्ला तीन खेल जिते पनि हैदराबादले १३ अंक मात्र पुर्याउन सक्नेछ, जुन प्लेअफमा पुग्न पर्याप्त हुने छैन।
चार टोलीले १४ अंक प्राप्त गरिसकेका छन्। दिल्लीले ११ खेलमा ६ जित र एक बराबरीबाट १३ अंक जोडेको छ। टोली अझै पनि पाँचौं नम्बरमा छ। तर, अब प्लेअफमा पुग्न दिल्लीले तीनमध्ये दुई खेल मात्र जित्नुपर्नेछ। दिल्ली १७ अंकसहित प्लेअफमा पुग्नेछ।
