बेरिङ्गटनको शतकमा युएईलाई २८३ रनको लक्ष्य

काठमाडौं । जिम्बावेमा जारी आईसीसी एकदिवसीय विश्वकप छनोट प्रतियोगितामा युएईले स्कटल्यान्डबाट २ सय ८३ रनको लक्ष्य पाएको छ । 

जिम्बावेको बुलाबायो एथलेटिक्स क्लबमा टस हारेर पहिला ब्याटिङ गरेको स्कटल्यान्डले निर्धारित ५० ओभरमा ८ विकेट गुमाएर २ सय ८२ रन बनाएको हो । 

स्कटल्यान्डका लागि कप्तान रिचिं बेरिङ्गटनले १ सय ३६ बलमा ९ चौका र ३ छक्काको सहयोगमा १ सय २७ रनको शतकीय ईनिङ खेले । ओडिआई करियरको चौथो शतक बेरिङ्गटनले १ सय २३ बलमा पूरा गरेका थिए । ईनिङको अन्तिम बलमा कप्तान रन आउट हुन पुगे । 

सुरुआत राम्रो हुन नसकेको स्कटल्यान्डले पहिलो पावर प्लेमा २६ रन बनाउँदा ३ विकेट गुमाईसकेको थियो । तेस्रो विकेट पश्चात क्रिजमा आएका कप्तान रिचि आएका थिए ।

छैटौं विकेटका लागि कप्तान रिचिले माईकल लिक्ससँग ७४ बलमा ६७ रनको साझेदारी गरे । यो साझेदारीले टिमलाई सम्मानजनक योगफलसम्म पुग्न सहयोग गर्यो । लिक्सले ४६ बलमा ३ चौका र २ छक्काको सहयोगमा ४१ रन बनाए । 

सातौं विकेटका रुपमा कप्तानले क्रिस ग्रेभ्ससँग ५७ बलमा ५१ रनको साझेदारी गरे । ग्रेभ्सले २८ बलमा ३ चौकाको सहयोगमा २२ रन बनाए । आठौं विकेटका लागि कप्तान बेरिङ्गटन र मार्क वाटले ६६ बलमा १ सय ९ रनको साझेदारी गरे । यो साझेदारीले टोलीलाई बलियो योगफलसम्म पुर्यायो । 

वाटले ३१ बलमा ४ चौका र २ छक्काको सहयोगमा अविजित ४४ रन बनाए । 

युएईका लागि जुनेद सिद्धिकीले ३ तथा अलि नासिरले २ विकेट लिए । 

स्कटल्यान्डले पहिलो खेलमा आयरल्यान्डलाई रोमान्चक रुपले पराजित गरेको थियो । यस खेलमा पनि सोहि लयलाई निरन्तरता दिन चाहान्छ । 

युएई भने सुरुआती दुई खेल गुमाएर प्रतियोगिताबाट बाहिरिने संघारमा रहेको छ । सुपर सिक्सको सम्भावना जीवित राख्न युएईलाई स्कटल्यान्डविरुद्धको खेल जित्न आवश्यक रहेको छ ।