काठमाडौं । आईसीसी एकदिवसीय विश्वकप छनोट प्रतियोगिता अन्तर्गत भोली शनिबार नेपाल र नेदरल्यान्ड्सबीच खेल हुदैछ ।
नेदरल्यान्ड्सविरुद्ध नेपालको खेल टाकासिंगा स्पोर्टस् क्लबमा नेपाली समय अनुसार दिउँसो पौने १ बाट सुरु हुदैछ ।
आईसीसी एकदिवसीय विश्वकप छनोटमा नेपाल र नेदरल्यान्ड्सबीचमा पहिलो पटक खेल हुन लागेको हो । तर, एकदिवसीय अन्तराष्ट्रिय (ओडिआई) मा भने नेपाल र नेदरल्यान्डबीच खेल भईसकेको छ ।
हालसम्म नेपाल र नेदरल्यान्डबीचमा २ ओडिआई खेल भएको छ । २ मध्ये १ खेलमा नेपालले र अर्को खेलमा नेदरल्यान्ड्स विजयी भएको थियो ।
नेपाल र नेदरल्यान्ड्सबीचको पहिलो खेल नेदरल्यान्ड्स र नेपालको दुई एकदिवसीय खेलको सिरिजमा भएको थियो । पहिलो भेट २०१८ अगस्ट १ मा भएको थियो । यो भेट नेपालका लागि ऐतिहासिक रहेको थियो । यो खेल नै नेपाली क्रिकेटमा ओडिआई मान्यता प्राप्त पहिलो खेल रहेको थियो । तर, सो ऐतिहासिक खेल नेपालले गुमाएको थियो ।
सो खेल नेदरल्यान्ड्सले ५५ रनले जितेको थियो । खेलमा टस जितेर घरेलु टोली नेदरल्यान्ड्सले पहिले ब्याटिङ गरेको थियो । माईकल रिप्पोनको अर्धशतकको सहयोगमा नेदरल्यान्ड्स ४७ दशमलब ४ ओभरमा १ सय ८९ रनमा अलआउट भएको थियो ।
नेपालका लागि तत्कालिन कप्तान पारस खड्काले ४ तथा तीव्र गतिका बलर सोमपाल कामीले ३ विकेट लिएका थिए । नेदरल्यान्ड्सका लागि रिप्पोनले ७६ बलमा ५१ तथा बस डि लिडले ६० बलमा ३० रन बनाएका थिए ।
१ सय ९० रनको लक्ष्य पछ्याएको नेपाल ४१ दशमलब ५ ओभरमा १ सय ३४ रनमा अलआउट भएको थियो । ज्ञानेन्द्र मल्लले ओडिआई क्रिकेटमा नै नेपालका पहिलो अर्धशतक बनाएका थिए । मल्लले ६१ बलमा ५१ रन बनाउँदा दीपेन्द्रसिंह ऐरीले ४८ बलमा ३३ रन बनाएका थिए । नेदरल्यान्ड्सका लागि पिटर सिलर र माईकल रिप्पोनले समान ३/३ विकेट लिएका थिए ।
नेपाल र नेदरल्यान्ड्सबीच सोहि सिरिजको दोस्रो खेलमा नेपालको पछिल्लो भेट भएको थियो । यस खेल नेपालले १ रनले रोमान्चक तबरले जितेको थियो । टस जितेर नेपालले ब्याटिङ रोजेको थियो । तत्कालिन कप्तान पारस खड्का र सोमपाल कामीको अर्धशतकको सहयोगमा नेपाल ४८ दशमलब ५ ओभरमा २ सय १६ रनमा अलआउट भएको थियो ।
नेपालका लागि सोमपाल कामीले ४६ बलमा ७१ तथा कप्तान खड्काले ६९ बलमा ५१ रन बनाएका थिए । नेदरल्यान्ड्सका लागि फ्रेड क्लेसनले ३ तथा माईकल रिप्पोनले २ विकेट लिएका थिए ।
२ सय १७ रनको लक्ष्य पछ्याएको नेदरल्यान्ड्स निर्धारित ५० ओभरका अन्तिम बलमा २ सय १७ रनमा अलआउट भएको थियो । नेपालका लागि सन्दीप लामिछानेले ३ तथा ललित भन्डारीले २ विकेट लिएका थिए । नेदरल्यान्ड्सका लागि वेस्ले बेरेसीले ८९ बलमा ७१ तथा डानियल टेर ब्राकले ८३ बलमा ३९ रन बनाएका थिए ।
