काठमाडौं । अष्ट्रेलियामा रहेका नेपाली राष्ट्रिय क्रिकेट टिमका कप्तान सन्दीप लामिछाने शनिबार नेपाल आइपुग्ने भएका छन् ।
लामिछाने शुक्रबार अष्ट्रेलियाबाट प्रस्थान गर्ने तथा शनिबार नेपाल आइपुग्ने नेपाल क्रिकेट संघ (क्यान) का टेक्निकल एनालिस्ट रमन शिवाकोटीले जानकारी गराए ।
नेपाल फर्किएपछि लेग स्पिनर लामिछानेले नेपाली टोलीको बन्द प्रशिक्षणमा संलग्न हुनेछन् ।
नेपालले अहिले आईसीसी पुरुष टी–ट्वान्टी विश्वकपको ग्लोबल छनोटका लागि तयारी गरिरहेको छ ।
ग्लोबल छनोट अन्तर्गत समूह ‘ए’ मा रहेको नेपालले ओमानमा फेब्रुअरी १७ देखि २४ तारिखसम्म हुने प्रतियोगितामा सहभागिता जनाउने छ ।
ग्लोबल छनोटकै लागि लामिछाने नेपाल आउन लागेका हुन् ।
अहिले उनी बिग बास लिग (बीबीएल) खेल्न अष्ट्रेलियामा रहेका छन् ।
लामिछानेले होबार्ट हरिकेन्सका लागि बीबीएल खेल्दै आएका छन् ।
लामिछानेले होबार्टका लागि यस सिजनमा १४ खेल खेल्दै १४ विकेट लिएका छन् ।
यसैबीच क्यानले लामिछानेको कप्तानीमा १६ सदस्यीय नेपाली टोलीको घोषणा गरेको छ ।
