काठमाडौं । नेपाली राष्ट्रिय क्रिकेट टिमका ब्याट्सम्यान शरद भेषवाकरले युवा क्रिकेट खेलाडीले डररहित क्रिकेट खेलिरहेको बताएका छन् ।
नेपाल एपीएफ क्लबलाई पीएम कपको उपाधि दिलाएपछि टियु क्रिकेट मैदानमा संचारकर्मीसँग कुरा गर्दै शरदले नेपाली क्रिकेटमा युवा खेलाडीको आगमन भएको र उनीहरु डररहित खेलिरहेको बताएका हुन्।
'युवा खेलाडीहरु आएका छन् । उनीहरुले डररहित क्रिकेट खेलिरहेका छन् । जुन ट्रेण्ड थिएन पहिले नेपाली क्रिकेटमा । अहिले ठुलो परिवर्तन देखिएको छ,' एपीएफका कप्तान समेत रहेका शरदले भने, 'आउने प्रतियोगिताका लागि टप अर्डर बलियो देखिएको छ ।'
बुधबार भएको फाइनलमा नेपाल पुलिस क्लबलाई २१ रनले हराउँदै एपीएफ च्यापियन बनेको हो ।
'एकदमै खुशी छौँ । दुई वटा फाइनल पुगेर हारेका थियौं । धेरै पछि फाइनल जित्न पाउदा पुरै टिम एकदमै खुशी छौँ,' उपाधिपछि शरदले भने, 'आज फरक विकेट थियो । घाँस पनि बढी थियो । बिहानको समय टियुमा गार्हो हुन्छ । हामीले विकेट गुमाएपनि रनरेट राम्रो थियो । सबै टिम १० नम्बरको ब्याट्सम्यानसम्म सबैले योगदान गरेर फाइट गर्न सक्ने लक्ष्य भयो ।'
यस्तै कप्तान शरदले प्रदिप ऐरी, आशिफ शेख लगायत अन्य ब्याट्सम्यानको प्रसंशा गरे ।
'प्रदिप र आशिफले सबै खेलमा राम्रो सुरुवात दिएकोले फाइनल सम्मको यात्रामा सजिलो भयो,' उनले भने, '१६ ओभरसम्म सामान्य खेल्ने त्यसपछिको चार ओभरमा आक्रामक खेल्ने योजना थियो । अन्तिममा अमर र भुवनले जसरि ब्याटिङ गर्यो त्यसले राम्रो योगफल तयार भयो ।'
कप्तान शरदले एपीएफको उपाधिमा किशोर महतो र अविनाश बोहराको बलिङलाई क्रेडिट दिए ।
'डेथ बलिङ निकै महत्वपूर्ण रह्यो । योर्करहरु पर्फेक्ट भयो । उनीहरुलाई क्रेडिट दिनुपर्छ । अन्तिममा किशोर र अविनाशले अन्तिम २-३ ओभर जसरि बलिङ गर्यो,' उनले थपे ।
1653664665.JPG)
1653659580.JPG)
1653659420.JPG)
