काठमाडौं । एसोसिएट राष्ट्र मध्यको बलियो टोली हो, नेदरल्यान्ड्स । अन्तरष्ट्रिय क्रिकेट परिषद (आईसीसी)को टी-ट्वान्टी वरीयतामा एसोसिएट राष्ट्र पाँचौं स्थानमा रहेपनि नेदरल्यान्ड्स टेष्ट राष्ट्रलाई समेत मात दिन सक्ने टिम हो ।
मलेसिया भने ‘अण्डर डग’ टोली हो ।
आईसीसीको वरीयतामा मलेसिया ३१ औं स्थानमा छ । कमजोर टोली मानिने मलेसियाले नेपाललाई पराजित गरिसकेको छ । उसले एसोसिएट राष्ट्रको एक उत्कृष्ट टोली हङकङलाई लगातार ६ पटक पराजित गरिसकेको छ ।
नेदरल्यान्ड्स र मलेसियाले आउने शनिबारबाट घरेलु टोली नेपालसँग त्रिकोणात्मक टी-ट्वान्टी सिरिज खेल्दै छन् । दुवै टोली सिरिजका लागि नेपाल आईसकेका छन् । उद्घाटन खेलमा नेपाल र नेदरल्यान्ड्स भिड्नेछन् ।
नेदरल्यान्ड्सले हाल विश्व वरीयताको शीर्ष स्थानमा रहेको इंग्ल्यान्डलाई दुई पटक पराजित गरिसकेको छ । उसले इंग्ल्यान्डलाई सन् सन् २००९ र २०१४ को टी–ट्वान्टी विश्वकपमा क्रमश ४ विकेट र ४५ रनले पराजित गरेको थियो । नेदरल्यान्ड्सले टेष्ट राष्ट्र इंग्ल्यान्ड बाहेक बंगलादेश, न्युजिल्यान्ड, जिम्बाबे, अफगानिस्तान र आयरल्याण्डलाई चक्मा दिईसकेको छ ।
नेदरल्यान्ड्सले हालसम्म तीन पटक टी-ट्वान्टी विश्वकपमा सहभागिता जनाईसकेको छ । तीन पटक टी–ट्वान्टी विश्वकपमा उसले १२ खेल खेल्दै ५ खेलमा जित हात पारिसकेको छ । यस्तै, कोरोना माहामारीको कारण प्रभावित भएको सन् २०२० को टी–ट्वान्टी विश्वकपमा समेत छनोट भइसकेको थियो ।
वरीयता हेर्ने हो भने नेदरल्यान्ड्स भन्दा नेपाल दुई स्थान अघि छ । नेपाल आईसीसी टी–ट्वान्टी वरियतामा १५ औं स्थानमा छ भने नेदरल्यान्ड्स १७ औं स्थानमा छ ।
एसोसिएटतर्फ नेपाल तेस्रो तथा नेदरल्यान्ड्स पाँचौं स्थानमा छ ।
एसोसिएट राष्ट्रलाई खेलमा वरीयताले खासै फरक पार्दैन । एसोसिएट टिमले मैदानमा देखाउने खेल नै उसको स्तर नाप्ने यन्त्र हुन्छ । एसोसिएट राष्ट्रले औसत खेलनै कम खेल्ने भएकाले वरीयताको महत्व कम हुन्छ ।
नेपालले आयोजना गर्न लागेको टी–ट्वान्टी अन्तराष्ट्रिय त्रिकोणात्मक सिरिज घरेलु भुमिमा पहिलो पटक हुन लागेका हो । यसअघि नेपालले १३ औं दक्षिण एसियाली खेलकुद (साग) आयोजना गरेपनि सो प्रतियोगितामा श्रीलंका र बंगलादेशको यू–२३ टोली सम्मिलित थिए ।
नेपालले सन् २०१४ मा पहिलो पटक टी-ट्वान्टी अन्तराष्ट्रिय मान्यता पाएको थियो । त्यस मान्यता नेपालले लामो समय जोगाउन सकेन । त्यस अवधिभर नेपालले दुई टी-ट्वान्टी अन्तरष्ट्रिय सिरिज खेलेपनि घरेलु भुमिमा अन्तराष्ट्रिय सिरिज आयोजना गर्न सकेन । सन् २०१८ मा नेपालले पहिलो पटक एकदिवसीय अन्तराष्ट्रिय क्रिकेटको मान्यता पायो । एकदिवसीय अन्तराष्ट्रियको मान्यता पाउदा सो राष्ट्रले स्वत टी-ट्वान्टी मान्यता समेत पाउँछ ।
हाल आईसीसीले सबै राष्ट्रलाई टी-ट्वान्टी अन्तराष्ट्रियको मान्यता दिएको छ ।
नेपाल र नेदरल्यान्ड्सको हेड टु हेड
नेपालको लागि नेदरल्यान्ड्स चिरपरिचित प्रतिद्वन्दी हो । नेपालले सर्वाधिक टी-ट्वान्टी नेदरल्यान्ड्सविरुद्ध खेलेको छ । सिरिजमा दुवै टोली उपाधि दाबेदार हुन् । एसोसिएट राष्ट्रको एक बलियो टोली नेदरल्यान्ड्सलाई घरेलु भूमिमा हराउनु नेपाललाई ठुलो चुनौती छ । यस्तै नेदरल्यान्ड्सलाई समेत नेपाली समर्थकसामु खेल्न सहज हुने छैन ।
हालसम्म नेपालले नेदरल्यान्ड्ससँग ८ टी-ट्वान्टी खेल खेलेको छ । जसमा ६ टी-ट्वान्टी अन्तराष्ट्रिय रहेको छ भने २ टी–ट्वान्टी खेल रहेको छ । नेपालले कुनैपनि राष्ट्रसँग खेलेको यो खेल सर्वाधिक हो ।
नेपालले ८ खेल मध्य जम्मा दुई टी–ट्वान्टी अन्तराष्ट्रिय खेलमा जित हात पारेको छ भने नेदरल्यान्ड्सले ५ खेलमा दुई टी ट्वान्टी र तीन अन्तरष्ट्रियमा जित निकालेको छ ।
नेपाल र नेदरल्यान्ड्सको पहिलो भेट सन् २०१२ को आईसीसी टी–ट्वान्टी विश्वकप छनोटमा भएको थियो । सो खेलमा नेपालले मात्र ८५ रन बनाउँदा नेदरल्यान्ड्सले ६ विकेटको सहज जित निकालेको थियो ।
सन् २०१३ मा पुनः विश्वकप छनोटमा समेत नेपाल १ सय ७ रन जोड्दा नेदरल्यान्ड्सले ५ विकेटको जित हात पार्यो ।
दुवै राष्ट्रको पहिलो टी ट्वान्टी अन्तराष्ट्रिय खेल सन् २०१५ मा भएको थियो । सन् २०१४ मा टी ट्वान्टी विश्वकप खेलेपछि पाएको एतिहासिक टी–ट्वान्टी मान्यतापछि नेपाल नेदरल्यान्ड्स भ्रमणमा निस्किएको थियो । चार खेलको भ्रमण सिरिजमा नेपालले मात्र १ खेलमा जित हात पार्यो, जुन नेपालले नेदरल्यान्ड्समाथि पहिलो पटक जित दर्ता गर्न सफल भयो ।
पहिलो खेलमा १ सय ३५ रनको लक्ष्य पछ्याएको नेपालले मात्र १ सय १६ रन बनाउन सक्यो । दोस्रो खेलमा नेपालले लज्जास्पद हार व्यहोर्यो । १ सय ७२ रनको ठुलो लक्ष्य पछ्याउने क्रममा नेपाल मात्र ६९ रनमा समेटियो ।
नेदरल्यान्ड्सविरुद्ध नेपालले बनाएको यो नै सबै भन्दा कम रन हो । तेस्रो खेलमा १ सय ४९ रनको लक्ष्य पछ्याउने क्रममा नेपालले १ सय ३१ रन बनायो ।
अन्तिम खेलमा भने नेपालले नेदरल्यान्ड्सलाई पहिलो पटक पराजित गर्न सफल भयो । १ सय ४० रन पछ्याएको नेपालले २ बल बाँकी छँदा ७ विकेट गुमाएर लक्ष्य पुरा गर्यो ।
सन् २०१८ को इंग्ल्यान्ड भ्रमणमा नेपालले नेदरल्यान्ड्स र मेरिलिबोन क्रिकेट क्लबसँग त्रिकोणात्मक सिरिज खेल्यो । जसमा नेपाल र नेदरल्यान्ड्स बीचको खेल वर्षाले प्रभावित भयो ।
यस्तै, नेपाल र नेदरल्यान्ड्सको अन्तिम भेट ओमानमा भएको पाँच राष्ट्र सम्मिलित टी–ट्वान्टी सिरिजमा भएको थियो । जुन खेलमा नेपालले नेदरल्यान्ड्सलाई ४ विकेटले पराजित गरेको थियो ।
नेदरल्यान्ड्सविरुद्ध नेपालको खेल तथ्य -
सर्वाधिक रन बनाउने नेपाली खेलाडी : पारस खड्का (७ इनिङमा १७६ रन)
एक इनिङमा सर्वाधिक रन बनाउने नेपाली खेलाडी : पारस खड्का (५४ रन)
सर्वाधिक स्ट्राइक रेट : करण केसी (१२८.५७)
सर्वाधिक विकेट लिने नेपाली खेलाडी : बसन्त रेग्मी (७ इनिङमा १२ विकेट)
बेस्ट बलिङ फिगर : करण केसी (१७ रन खर्चेर ४ विकेट)
वरीयता र खेल स्तरको आँकंलन अनुसार फाइनल खेल्ने नेपाल र नेदरल्यान्ड्स भिड्ने अनुमान गर्न सकिन्छ ।
फाइनलमा जसले राम्रो खेल्यो, च्याम्पियन उही बन्नेछ ।
