काठमाडौं । विश्वभर महामारीको रुपमा फैलिएको कोरोना भाईरस (कोभिड-१९) को कारण विश्व आतंकित रहेको छ ।
चीनबाट फैलिएको कोरोनाको कारण विश्वमा ५८ हजार मानिसको मृत्यु भईसकेको छ । यस्तै १० लाख भन्दा बढी मानिस संक्रमित भएका छन् ।
एक व्यक्तिबाट अर्कोमा चाँडै सर्ने सरुवा रोग र औषधि नबनेको कारण कोरोनाले भयानक रुप लिएको हो ।
त्यसैले कोरोना सर्न नदिन अहिले विश्वका थुप्रै देशले लकडाउन गरेका छन् । एक देशबाट अर्को देशमा आवतजावत बन्द गरिएको छ । हरेक देशले जनतालाई घर बाहिर ननिस्कन आदेश दिएको छ ।
जसको कारण विश्व अस्तव्यस्त बनेको छ । त्यसैको मारमा खेलकुद पनि छ ।
विश्वमा चलिरहेको राष्ट्रिय तथा अन्तराष्ट्रिय प्रतियोगिता स्थगित भएका छन् । नेपाली खेलकुद पनि यसबाट अछुतो रहेन ।
कोरोनाकै कारण अन्तर्राष्ट्रिय क्रिकेट परिषद (आईसीसी) को ३ वर्षे निलम्बन फुकुवापछि पुनर्जीवन पाएको नेपाली क्रिकेटमा ठुलो असर परेको छ ।
निलम्बन फुकुवापछि नेपाल क्रिकेट संघ (क्यान) बिस्तारै आफ्नो लय समात्ने क्रममा रहेको थियो । आईसीसीबाट सशर्त फुकुवा भएको क्यानले २ अन्तर्राष्ट्रिय प्रतियोगिताको सफल आयोजनासँगै घरेलु प्रतियोगितालाई ब्युताउने तयारी गर्दै थियो ।
'क्यानले आफ्नो लय समात्दै थियो, कामहरु दैनिक रुपमा हुँदै थियो,' क्यानका कोषाध्यक्ष रोशन बहादुर सिंह भन्छन्, 'दैवको लिला, कोरोना भाईरसको कारण सबै अहिले रोकिएको छ । क्वारेन्टाइनमा भएपनि घरबाट काम गर्दैछौं ।'
क्यानले आफ्नो वार्षिक खेल तालिका बनाएको थियो । क्यानले केही प्रतियोगिताको मिति समेत सार्वजनिक गरेको थियो । तर, कोरोनाको कारण कुनै पनि प्रतियोगिता समयमा गराउन नसक्ने अवस्था भएको छ ।
'घरेलु लिगहरु सुरु हुँदै थियो तर स्थगित हुन पुग्यो । सबै कुरा अनुकुल भएपछि फेरी सबै नियमित हुन्छन्,' कोषाध्यक्ष सिंहले भने ।
क्यानले चैत्र अन्तिममा महिला र पुरुषको प्रधानमन्त्री कप प्रतियोगिता सक्ने र अन्य उमेर समूहको प्रतियोगिता पुन: सुचारु गर्ने तयारी गरेको थियो । क्यानले खेलाडी छनोट सक्न जिल्ला र प्रदेशलाई पत्र समेत पठाएको थियो ।
काठमाडौं जिल्लाले त छनोट प्रतियोगिता समेत आयोजना गरिसकेको छ । तर, कोरोनाका कारण बाँकी सबै प्रतियोगिता अनिश्चितका लागि स्थगित भएको छ । तालिका सार्वजनिक गरिएको प्रतियोगिताहरुको मिति पुन: मिलाउनु पर्ने भएको छ ।
'महाविपत्ति, कसैले रोकेर रोकिन्न । सबै अस्तव्यस्त बनायो,' कोषाध्यक्ष सिंह भन्छन्, 'तर सबै सामान्य भएपछि क्यानले लिगहरु मिलाएर आयोजना गर्छ ।'
क्रिकेटको मौषम र वर्षा मौषमको कारण क्यानलाई अबको तालिका मिलाउन निकै कठिन हुनेछ । कोरोनाको कारण चैत्र मसान्तसम्म कुनै खेल प्रतियोगिता नहुने पक्का छ । त्यसपछीको मौषम वर्षाको रहेको कारण खेल खेलाउन केही समस्या हुनेछ । लाम्बद्द क्रिकेट प्रतियोगिता रहेको कारण वर्षा सुरुवात हुनेबेलासम्म लिगहरु नसकिने देखिएको छ ।
यस्तै प्रधानमन्त्री कप राष्ट्रिय प्रतियोगिता रहेको कारण राष्ट्रिय खेलकुद परिषद (राखेप) ले बजेट उपलब्ध गराउने गर्छ । तर, असार मसान्तसम्म प्रतियोगिता नगरे बजेट फ्रिज हुने भएकाले अर्को चुनौती छुट्टैछ ।
करिब २ महिनाबाट मुख्य प्रशिक्षक विहीन रहेको नेपाली टिमको लागि क्यानले योग्य विदेशी प्रशिक्षकको खोजी प्रक्रिया अघि बढाउन सकेको छैन । आईसीसी र एसीसीसँगको सहयोगमा नेपालले प्रशिक्षक ल्याउने गृहकार्य गरिरहेको छ ।
विगत ४ वर्षबाट बाँकी रहेको (क्यान निलम्बनमा रहेको बेला) अडिट रिपोर्ट तयारी गर्दै थियो । त्यस कार्यलाई समेत कोरोनाले रोकिदिएको छ ।
'लामो समय देखी बाँकी रहेको अडीट रिपोर्ट बनाउदै थियौं । कोरोनाले रोकिदियो,' सिंहले भने, 'अहिले मिल्लने जति घरबाट पनि गरिरहेको छु ।'
खेलाडीको लागि नयाँ ग्रेडिङ बनाएको क्यानले आउने बैठकमा त्यसलाई सार्वजनिक गर्ने तयारी गरेको थियो । जसमा १८ महिला खेलाडीले पहिलो पटक क्रिकेट संघसँग सेन्ट्रल कन्ट्रयाक्ट पाउँदै थिए ।
'खेलाडी ग्रेडिङको सबै अन्तिम चरणमा थियो । बैठक बसेर त्यसलाई पारित गराउने काम बाँकी थियो । कोरोनाले नै त्यसलाई पछि सार्न बाध्य बनायो,' खेलाडी ग्रेडिङ समितिका संयोजक समेत रहेका सिंहले भने ।
लगातार अन्तर्राष्ट्रिय प्रतियोगितामा खराब प्रदर्शन गर्दै आएको नेपाली टिमको सुधारको लागि क्यानले खेलाडी र अफिसियलसँग गम्भीर समिक्षा गर्ने योजना बनाएको थियो । गत महिना मात्र उपाधि दाबेदार मानिएको नेपालले इस्टर्न रिजन क्रिकेटमा खराब प्रदर्शन गरेपछि क्यानले आफ्नो ध्यानआकर्षण भएको जनाएको थियो । जसको समिक्षा क्यानले कसरी गर्छ भन्ने सबैको चासोको विषयलाई कोरोनाले रोकिदिएको छ ।
त्यस्तै निजि क्षेत्रबाट संचालन हुँदै आएको एभरेष्ट प्रिमियर लिग (ईपीएल) ले ठुलो घाटा व्यहोर्नु परेको छ । विश्वका चर्चित खेलाडीले सहभागिता जनाउने पक्का भएको लिग अनिश्चित कालका लागि स्थगित गरिएको छ । कोरोनाले रोकिनु अघि लिग चैत्र १ गतेबाट सुरुहुने तालिका रहेको थियो ।
कोरोनाकै कारण नेपालले खेल्ने २ सिरिज स्थगित भएको छ । विश्वकप छनोटको बाटो रहेको आईसीसी क्रिकेट विश्वकप लिग-२ को दुई सिरिज पछि सरेको हो ।
