काठमाडौं । प्रधानमन्त्रीको नाममा सञ्चालन हुदै आएको एक दिवसीय राष्ट्रिय क्रिकेट प्रतियोगिताको खेलाडीको पुरस्कार राशीमा ठगी गरिएको छ ।
सरकारकै खेलकुदको कार्यकारी निकाय राष्ट्रिय खेलकुद परिषद् (राखेप) र नीजि कम्पनी नेपालय ईन्टरनेश्नलले मिलेर खेलाडीको पुरस्कार राशीमा ठगी गरेका हुन् ।
सर्वोकृष्ट खेलाडीलाई मोटरसाईकल र विधागततर्फका उत्कृष्टलाई जनही ५० हजार दिने घोषणा सहित प्रतियोगिता सुरु गरिएको थियो । तर समापन समारोहमा सर्वोकृष्ट खेलाडीलाई ५० हजार र विधागततर्फका उत्कृष्टलाई जनही ३० हजार रुपैयाँ प्रदान गरिएको थियो ।
पुरस्कारमा आयोजकले बदमासी गरेको भन्दै खेलाडीले रकम लिन अस्विकार गरेका थिए ।
तेस्रो संस्करणको प्रतियोगिता आयोजना गर्न एक करोड ७५ लाख रुपैयाँ लाग्ने बताईएको थियो । जसमा राखेपले ८० लाख र बाँकी रकम नेपालयले प्रायोजकको सहयोगमा उपलब्ध गराउने बताईएको थियो ।
प्रतियोगिताको पुरस्कारमा मात्र ५० लाख रुपैयाँ खर्च हुने दाबी गरिएको थियो । तर प्रतियोगिताको अन्तिममा दुवै पक्ष एक अर्कालाई दोष लगाउँदै पुरस्कार रकम दिन आनाकानी गरेका थिए ।
तत्कालिन सदस्य सचिव केशवकुमार विष्टले ईभेन्ट कम्पनी नेपालयले घोषणा गरिएको पुरस्कार रकम उपलब्ध गराउने बताएका थिए । उनले नेपालयका अध्यक्ष सुवास प्रधानलाई राखेपमा बोलाएर घोषणा गरिएको मोटरसाईकल र नगद रकम उपलब्ध गराउने सम्झौता समेत गराएका थिए ।
सुवासले एक महिना भित्र घोषणा गरिएको रकम उपलब्ध गराउने बाचा गरेका थिए । लगत्तै अध्यक्ष प्रधान एक कार्यक्रमका लागि भन्दै अष्ट्रेलिया निस्किएका थिए ।
तर अष्ट्रेलियाबाट फर्किएका अध्यक्ष प्रधानले कुरा समेत फेरेका छन् । उनले आफुले मोटरसाईकल र नगदको कुनै घोषणा नगरेको भन्दै झुट बोल्न थालेका छन् । यस बिषयमा प्रतिक्रिया दिन खोज्दा नेपालयका अध्यक्ष प्रधान खेलपाटीको सम्पर्कमा आउन चाहेनन् ।
सदस्य सचिव फेरिए, कुरा पनि फेरियो
तत्कालिन सदस्य सचिव विष्टले घोषणा गरिएको रकम सह आयोजक नेपालयबाट दिलाउने प्रतिबद्वता व्यक्त गरेका थिए । तर पछिल्लो एक महिनामा राखेपको सदस्यमा सचिवमा परिवर्तन भएसंगै कुरा समेत फेरिएको छ ।
नव नियुक्त सदस्य सचिव रमेश सिलवालले दुई पक्षबीचको सम्झौता हेर्दा सर्वोकृष्ट खेलाडीलाई ५० हजार र विधागततर्फका खेलाडीलाई ३० हजार रुपैयाँ दिने उल्लेख रहेको दाबी गरे ।
‘मैले सम्झौतामा के छ भन्ने हेर्ने हो । त्यो आधारमा कुरा गर्ने हो ।’ सिलवालले खेलपाटीसंग भने, ‘खेलाडीलाई समेत देखाएको छु । कागजमा बोलेको कुरा हो ।’
उनले सम्झौतामै सर्वोकृष्ट खेलाडीलाई ५० हजार र उत्कृष्ट बलर र ब्याट्सम्यानलाई जनही ३० हजार दिने उल्लेख रहेको बताए ।
खेलाडीले बुझे रकम
घोषणा गरिएको पुरस्कार तत्काल पाउने छाँट नदेखिएपछि खेलाडीले भने आयोजकले दिएको रकम बुझेका छन् । सर्वोकृष्ट खेलाडी सहित उत्कृष्ट बलर बनेका ललित राजवंशीले ८० हजार र सर्वोकृष्ट ब्याट्सम्यान बनेका राजु रिजालले ३० हजार रुपैयाँ बुझेका छन् ।
‘असार मसान्त सम्म नलिए रकम फ्रिज हुने भनेर राखेपले भन्यो ।’ ललितले खेलपाटीसंग भने, ‘सदस्य सचिवले मोटरसाईकलका लागि हामी नि भन्छौ र तिमी नि भन भन्ने कुरा गर्नुभएको छ ।’
स्वार्थ केन्द्रित आयोजक
अन्तराष्ट्रिय क्रिकेट परिषद (आईसीसी)ले नेपाल क्रिकेट संघ (क्यान) निलम्बन गरेपछि घरेलु क्रिकेटका प्रतियोगिता ठप्पै छन् । सोही अवस्थामा राखेपले पहल कदमी लिदै नीजि कम्पनीसंग मिलेर प्रतियोगिता आयोजना गर्न सुरु गरेको थियो ।
तर प्रधानमन्त्रीको नामको प्रतियोगिता नीजि कम्पनीलाई ठेक्का दिएपनि आयोजक कम्पनी नाफामा मात्र केन्द्रित देखिए । प्रतियोगिताको व्यवस्थापनको जिम्मेवारी लिएको नेपालयले पिच तयार नभएको अवस्थामा म्याटमै एक दिवसीय प्रतियोगिता खेलाएको थियो ।
क्रिकेटको बढ्दो लोकप्रियता र नीजि क्षेत्रको आकर्षणमा पीएम कप आयोजना गर्न धेरै नीजि कम्पनी ईच्छुक देखिएका थिए । त्यसमा राखेपले करिब करोड बराबरको रकम उपलब्ध गराउने भएपछि धेरैले प्रतियोगिता आयोजनामा ईच्छा देखाएका थिए ।
तर बिना प्रतिस्पर्धा राखेपले नेपायललाई प्रतियोगिता आयोजनाको जिम्मेवारी दिएको थियो । राखेप नेतृत्व र कर्मचारीलाई प्रलोभनमा पारेर नेपालय ईन्टरनेश्नलले प्रतियोगिता आयोजनाको जिम्मेवारी पाउने गरेको राखेपका कर्मचारीनै बताउँछन् ।
