काठमाडौं । हुन त मौसम राना मगर साथीहरुको लहैलहैमा लागेर फिटनेस ट्रेनिङ सेन्टर पुगेका थिए । प्लस टुको पढाई सकाएपछि उनी खाली जस्तै थिए । फिटनेसका लागि उनी ट्रेनिङ सेन्टरसम्म पुगे, र बक्सिङ खेल्न थाले ।
उनले स्कुल, कलेजमा साथीहरुसँग खेलेको बास्केटमात्र थियो । खेलसँग उनी खासै जोडिएका थिएनन् । तर प्लस टु पछिको खोली समय बिताउन फिटनेस सेन्टर पुगेका मौसम करिब पाँच वर्षमै बक्सिङको राष्ट्रिय च्याम्पियन बनेर निस्किएका छन् । हालै पोखरामा सम्पन्न नवौं राष्ट्रिय खेलकुदको बक्सिङतर्फ ६३ दशमलव ५ केजी तौल समुहमा मौसमले विभागका ठुला खेलाडीलाई पछि पार्दै स्वर्ण जित्न सफल भएका छन् । ‘प्लस टु सकेपछि बक्सिङ खेलसँग जोडिएको हुँ । खाली समय थियो । साथीहरुको लहैलहैमा लागेर सिक्न गएको हो । पाँच वर्षमै बक्सिङको राष्ट्रिय च्याम्पियन बन्न सके ।’ मौसम भन्छन् ।
सुरुआतमा मौसमको परिवार बक्सिङ खेल्ने कुरासँग सहमत थिएन । तर राष्ट्रिय च्याम्पियन बनेपछि मौसमको बक्सिङ करियरप्रति घरको लवज भने फेरिएको छ । ‘फिटनेस ठिक हो । बक्सिङनै चाही नखेल भन्नु हुन्थ्यो ।’ मौसम भन्छन्, ‘नवौंमा स्वर्ण जितेपछि घरको पनि सहयोग र सद्भाव बढेको छ ।’
मौसमको वुबाले लामो समय बैदेशिक रोजगारीको शिलसिलामा बहराईनमा बिताए । गुल्मी पुर्तीघाट स्थायी घर भएका मौसम सपरिवार काठमाडौंमा बस्छन् । उनले नवौं राष्ट्रिय खेलकुद बागमती प्रदेशबाट खेलेका थिए । तर राष्ट्रिय खेलकुदमा स्वर्ण जित्ने उनी गुल्मीका पहिलो खेलाडी बने ।
‘ठमेलको जेनेक्स फिटनेसमा अभ्यास गरिरहेको थिए । राष्ट्रिय खेलकुदका लागि छनोट हुने जानकारी आयो । ६५ दशमलव ५ केजी तौल समुहमा छनोट पार गरे ।’ राष्ट्रिय खेलकुदको यात्रा बारे मौसम भन्छन्, ‘लगत्तै क्लोज क्याम्प भयो । चालिस दिन जति क्याम्पमा बसेर अभ्यास गरियो ।’
राष्ट्रिय च्याम्पियन भुपेन्द्र थापा मगर डेङ्गुले खेल्न नपाएपछि मौसमको स्वर्ण यात्रा केही सहज बन्यो । उनको पहिलो खेलनै एपीएफका सोनम कार्कीसँग पर्यो । ‘उहाँको फिजिक्स राम्रो थियो । सिनियर खेलाडी भएकाले सम्मान पनि थियो । तर अन्तिम राउण्डमा अंक बटुल्ने गरि खेले । नतिजापनि निस्कियो ।’ मौसम भन्छन् ।
‘सेमिफाइनलमा गण्डकीका खेलाडीको हात फाँच्चिएर वाक ओभरनै पाए । फाइनलमा आर्मीसँगको खेल गाह्रो लागेन । सुरुमै सोनम दाईलाई जितेर आएको हुनाले डर पनि लागेन । पहिलो खेलले नै आत्मविश्वास थियो ।’ स्वर्ण यात्राबारे मौसम भन्छन् ।
लहैलहैमा बक्सिङमा लागेर राष्ट्रिय च्याम्पियन बनेका मौसमको अबको सपना अन्तराष्ट्रिय एरिनामा आफु र देशलाई चिनाउनु रहेको छ । नवौंको राष्ट्रिय च्याम्पियन बनेपछि उनको नजर अब साग र एसियन गेम्समा अडिएको छ ।
‘अब साफ र एसियन गेम्सको छनोट हुने कुरा छ । अब देशका लागि अन्तराष्ट्रिय एरिनामा खेल्ने इच्छा छ ।’ मौसम भन्छन् ।
-1746755007.webp)
