रोहित भन्छन्- लुम्बिनीले बलिङ राम्रो गर्न बुमराहलाई ल्याउनुपर्छ !
काठमाडौं। नेपाल प्रिमियर लिग (एनपिएल) मा लुम्बिनी लायन्सले लगातार उत्कृष्ट ब्याटिङ प्रदर्शन गरिरहे पनि जित निकाल्न असफल भइरहेको छ।
पहिलो खेलमा लुम्बिनीले खराब लयमा रहेको विराटनगर किङ्सविरुद्ध १९२ रनको चुनौतीपूर्ण लक्ष्य प्रस्तुत गरेको थियो। कप्तान रोहितकुमार पौडेलले ४६ रनको महत्त्वपूर्ण इनिङ्स खेले। तर, अन्तिम ओभरमा कमजोर बलिङका कारण विराटनगरले अन्तिम बलअघि नै दुई विकेटले खेल जित्यो।
दोस्रो खेलमा पनि लुम्बिनीले आक्रामक ब्याटिङ प्रदर्शन गर्यो। खराब लयमै रहेको पोखरा एभेन्जर्सविरुद्ध १७१ रनको प्रतिस्पर्धात्मक लक्ष्य राख्ने क्रममा रोहितले उत्कृष्ट ९५ रनको इनिङ्स खेले भने टम मुर्सेले ४५ रन थपे। यद्यपि, बलिङ विभागले पुन: निराशाजनक प्रदर्शन गरेपछि लुम्बिनीले यो खेल १० विकेटको फराकिलो अन्तरले गुमायो।
लुम्बिनीको ब्याटिङ क्षमता सराहनीय देखिए पनि बलिङ भने सोचेजस्तो हुन नसकेको रोहित बताउँछन्। ‘बल टर्न भइरहेको थियो। स्पिनरले राम्रो गर्छ भन्ने लागिरहेको थियो। तर, पावर प्ले मै ८०/९० रन खान पुग्यौं। त्यसपछि खेलमा फर्किन सकेनौं,’ उनले भने।
कुशल भुर्तेलको कप्तानीमा रहेको पोखराले चितवन राइनोजसँग ८७ रन र जनकपुर बोल्ट्ससँग सात विकेटको हार बेहोरेको थियो। लगातार ओपनिङ पार्टनर परिवर्तन गरे पनि पोखराले यी खेलमा राम्रो सुरुआत गर्न सकेको थिएन। चितवनविरुद्ध सात रन बनाउँदा नै ६ विकेट गुमाउँदा कप्तान कुशल शून्यमै पेभिलियन फर्किए। दोस्रो खेलमा उनले दिनेश खरेल र आन्द्रेस गौसलाई ओपनिङमा पठाएपनि उनीहरूले पनि उस्तै ‘फ्लप’ भए।
तर, लुम्बिनीविरुद्ध भने यी जोडिले नै पोखरालाई १६.५ ओभरमा कुनै विकेट नगुमाई सानदार जित दिलाए। ३१ वर्षीय गौसले अविजित रहँदै १०४ रन जोडे। उनी एनपिएलमा शतक प्रहार गर्ने पहिलो खेलाडीसमेत बन्न सफल भए। त्यसभन्दा अगाडि उनले सबैभन्दा छिटो (२० बलमै) अर्धशतक बनाउने खेलाडीको कीर्तिमान पनि कायम गरे।
यता, दिनेशले ४६ बलमा चार चौका र चार छक्कासहित अविजित रहँदै ६१ रनको योगदान दिए। उनीहरूबीच १७६ रनको कीर्तिमानी साझेदारीसमेत भयो। लुम्बिनीले पहिलो पावर प्लेमै ८० रन खर्चिएको थियो। उसका स्पिनर सूर्य तामाङबाहेक साद बिन जाफरसँगै तीन पेसर बलर दिनेश अधिकारी, रेमन्ड साईमन्ड्स र दुर्गेश गुप्ता नराम्री चुटिए।
साईमन्ड्सले १५, दुर्गेशले २९ (दुई ओभरमा), जाफरले १३ र दिनेशले २० रन खर्चिए। यो नै हारको ‘टर्निङ पोइट’ रहेको रोहित स्वीकार्छन्। ‘पावर प्लेमा योजना अनुसार खेल्ने पनि कोही देखिएन। त्यसले गर्दा पनि गाह्रो भएको हो,’ उनले भने।
लुम्बिनीले लिगमा अझै सुदूरपश्चिम रोयल्स, जनकपुर बोल्ड्स, चितवन राइनोज, काठमाडौं गुर्खाजसँगै कर्णाली याक्ससँग खेल्न बाँकी छ। यी सबै टोली ब्याटिङसँगै बलिङमा पनि उत्तिकै निपूर्ण देखिएका छन्। यस्तोमा लुम्बिनीको चाहिँ योजना के हुन्छ त? रोहित हाँसिमजाक थप्दै भन्छन्, ‘यही खेलाडीहरूलाई ब्याक गरेर खेल्नुपर्ने हुन्। त्यसैले कमजोरी के हो खोज्नुपर्ने हुन्छ। नत्र जसप्रित बुमराहलाई ल्याउनुपर्छ.... !’
